باتىل ىستەيتىن كادرلاردى باعالاي بىلەيىك

    گۋ بوچۇڭ

    جاقىندا نەگىزگى ساتىعا ءتۇسىپ تەكسەرۋ جۇرگىزگەندە، كەيبىر كادرلاردىڭ ءوز جۇمىستارىنا دارمەنسىزدىك تانىتىپ، باتىل قيمىلداي المايتىنى تۋرالى اڭگىمەلەسكەندە، كەي جولداستار: كوپتەگەن باسشىلار قىزمەتكە بۇرىننان دارمەنسىز ەمەس، قايتا باتىل ىستەيمىن دەپ تۇمسىعى تاسقا تيگەن، اينالاسىنداعى ۇساقشىلداردىڭ سالقىنى اسەر ەتىپ، ەش ادام وعان قولداۋشى، دەمەۋشى بولماعاندىقتان ارىنى قايتىپ جالىنى سونگەن، - دەيدى. بۇلاردىڭ ايتقانى ساۋساقپەن سانارلىقتاي بىرنەشە باسشىلاردىڭ حال - جايى عانا ەمەس. «اۋزى كۇيگەن ۇرلەپ ۇرتتايدى» دەگەندەي، بۇرىنعى ارىندارىنان ايىرىلىپ بۇعىپ قالعان.

    وسىنداي كادرلار ءۇشىن الىپ ايتقاندا، دۇرىس مامىلە جاساۋعا ءتيىستى ءبىر ماسەلە بار. باسقالار جاعىنان سوققىعا ۇشىراپ، جالالار جابىلعاندا، ولارعا تىرەك بولاتىن ادامنىڭ شىقپاۋى، ءادىل سوزدەر ايتىلماۋى، ال زيانداۋشىلاردىڭ اسىقتارى الشىسىنان ءتۇسىپ، الشاڭداي باسىپ جۇرگەندە جۇرەگىڭ سىزداپ، اينالاڭنان تۇڭىلەسىڭ، ءبىراق مۇندايدا ءجۇنى جىعىلىپ، ۇنجىرعاسى تۇسۋگە بولمايدى، قايتا قارسى اعىنعا قايراتتانا جۇزەتىن باتىلدىق كەرەك. سونىمەن بىرگە، ۇيىمدىق جاقتان دا باتىل ىستەيتىندەرگە قامقور كوزبەن قاراۋ كەرەك، تەك «دۇرىس مامىلە جاساۋ ءتيىس» دەي سالۋعا كەلمەيدى. باتىل ىستەيتىن كادرلار ءۇشىن العا شىعىپ، ولارعا قولداۋشى تىرەك بولا بىلمەسە، باتىل ىستەيتىندەر ءۇشىن ادىلەتسىزدىك ىستەپ، «جىلپوستار» مەن «كۇنشىلدەرگە» وراي جاراتىپ بەرگەن بولامىز. بۇنىڭ قوعامعا تيگىزەر كومەسكى زيانى وتە زور.

    ميكرولىق تۇرعىدان العاندا، كوپكە زالالى تيەتىندەرگە دەر كەزىندە توقتاۋ سالۋ كەرەك. كەيبىر باسشىلار باسشىلىق ورنىندا وتىرعانىمەن بەكەر ءجۇر، قىزمەت بارىسىندا اۋىر جۇك ارقالاعىسى كەلمەيدى، ارقالاي دا المايدى. ال الجاستىرۋعا كەلگەندە الدارىنا جان سالمايدى، باسقالاردىڭ كاسىپتەن ناتيجە جاراتقانىن كورسە، بولماسا ىسكەر كاسىپتەستەرى ءوز شوگەلدىگىمەن كوزگە تۇسسە قىزعانىشتان ىشتەرىن تىرناپ، اياقتان شالۋداي باقاي قۋلىقتارىنا باسادى. مىنە وسىعان قاراتا، ءتارتىپ تەكسەرۋ ورىندارى «ءىرىپ - شىرىگەندەردى تەكسەرىپ انىقتاۋ قىزمەت ناتيجەگە جاتسا، كادرلاردىڭ ىسكەرلىگىن، جاڭالىق اشۋىن قورعاۋدى دا قىزمەت ناتيجەسىنە جاتادى» دەگەن تانىم ورناتۋى كەرەك. جالتارماي، شەگىنشەكتەمەي، مايداندا بەرىك تۇرىپ، كەلەڭسىز جايتتەرمەن كۇرەس جاساۋ ارقىلى كادرلاردىڭ بەلسەندىلىگىن قورعاۋ كەرەك. اشالاپ ايتار بولساق، قىزمەتتى باتىل ىستەپ، باسقالاردىڭ مۇددەسىنە بوگەت بولعاندىقتان ارىز - شاعىم ارقالاعانداردى دەر كەزىندە انىق - قانىعىنا كوز جەتكىزىپ، قوعامنىڭ نازار اۋدارىپ وتىرعان ماسەلەلەرىنە اڭىس قايتارىپ، شىندىقتى انىقتاۋ؛ قىزمەتتە پرينسيپكە تاباندى بولىپ، باتىل ىستەگەنى ءۇشىن باسقالار جاعىنان ارىزعا شاتىلعاندار، جالا جابىلعاندار، وسەك - اياڭعا ۇشىراعاندار بولسا، قاتىستى زاڭ - تۇزىمدەر بويىنشا جالعان ارىز جازۋشىلاردىڭ زاڭدىق جاۋاپكەرشىلىگىن قۋزاۋ، ەسكەرتۋ بەرەتىندەرگە ەسكەرتۋ جاساۋ، ورنىن اۋىستىراتىندارىن اۋىستىرۋ، تەكسەرىپ ءبىر جايلى ەتەتىندەردى ءبىر جايلى ەتۋ قاجەت.

    كولەمدى تۇرعىدان العاندا، باتىل ىستەيتىندەردى شابىتتاندىراتىن ادام تاڭداۋ، ىستەتۋ مەحانيزمىن كەمەلدەندىرۋ كەرەك. ءبىر پاراساتتى ادام ىستەتسەڭ قاسىنان كوپتەگەن پاراساتتىلار شىعادى. وسى تۇرعىدان الىپ ايتساق، باتىل ىستەيتىن، قىزمەت اۋىرتپالىعىن ارقالاي الاتىن ادامداردى تاڭداپ ىستەتسە، ءبىر جاعىنان، قىزمەتتىڭ العا باسۋىنداعى قوزعاۋشى بولسا، ەندى ءبىر جاعىنان، اقيقاتتى جاقتاپ، سۇرقيالىقتى جويۋداعى بەلگى بولادى. ۇلكەن دۇرىس پەن ۇلكەن بۇرىس الدىندا اقيقاتتا تاباندى بولاتىن ادامدى، قيىنشىلىق، قايشىلىقتارعا ءدوپ كەلگەندە جاۋاپكەرشىلىك ارقالاي الاتىن ادامدى، ماسەلەلەردى ءبىر جاقتى ەتۋدە ويى انىق، ءادىس - امال تابا الاتىن ادامدى، ءورىس اشىپ زور ناتيجە جاراتا الاتىن ادامدى تاڭداپ ىستەتكەندە عانا ەلگەزەك، باتىل ىستەيتىن، جاۋاپكەرشىلىگى كۇشتى باسشىلاردىڭ قىزعىندىلىعىن ارتتىرىپ، كومەسكى كۇشتەرىن ساۋلەلەندىرۋگە جول اشىلادى. قولىنان ءىس كەلمەيتىن، ىستەسەدە ىستەگەن ءىسىنىڭ تامتىعى جوق ادامدارعا ەسكەرتۋ بەرۋگە، ءتىپتى، ىقسىرىپ شىعارىپ تاستاۋعا بولادى. سونىمەن بىرگە، باتىل ىستەيتىن باسشىلاردىڭ قىزمەت بارىسىندا وزىندىك ەرەكشەلىكتەرىنە كەڭ پەيىلدىك تانىتۋ، ءتىپتى، ماقتاۋ ايتۋ ءتيىس، باسشىلاردى تاڭداعاندا پرينسيپكە تاباندى بولۋمەن بىرگە، وزىندىك ەرەكشەلىككە قۇرمەت ەتۋ كەرەك. كادر تاڭداعاندا ءبارىن ءبىر شىبىقپەن ايداۋعا بولمايدى.

    ماكرولىق تۇرعىدان العاندا، باتىل جۇمىس جۇرگىزەتىن ساياسي ورتا جاراتۋ كەرەك. كەيدە باتىل جۇمىس ىستەيتىن باسشىلار شارۋانىڭ باسىن تەزىرەك قايىرۋعا، باسقالار ءۇشىن ءتيىمدى شارۋالاردى اتقارۋعا كەلگەندە، بارلىق ادامنىڭ تالابىنان شىعىپ كەتۋى ەكىتالاي. وسى ساتتە باتىل ىستەيتىن باسشىلاردى قولداۋ، قورعاۋ ءار دارەجەلى پارتيا ۇيىمدارىنىڭ ارقالاۋعا ءتيىستى جاۋاپكەرشىلىگى ءارى بورىشى، تانىم جاعىنان مىنا «3 نارسەنى اشالاپ الۋ» كەرەك: بۇرىس ستيلدەردى باتىل ۇشىقتاي الاتىندار مەن قىزمەتتە قىڭىر مىنەز تانىتىپ، كەرەناۋ جۇرەتىندەردى ايىرىپ الۋ؛ قىزمەتتى ارىندى ىستەيتىندەر مەن اتاق قۇمار، ءمانسابىنىڭ جوعارىلاۋى ءۇشىن ساياسي تىرەك ىزدەيتىندەردى ايىرىپ الۋ؛ قىزمەتتى شوگەل ىستەپ، جاڭالىق جاراتۋعا تالپىنىپ جۇرگەن «توپتىق كۇش» پەن توپ قۇرىپ، ءبولىنىپ جۇرگەندەردى ايىرىپ الۋ ءتيىس. ءبىر جاعىنان، پارتيانىڭ ءتارتىپ - تۇزىمدەرىمەن باسشىلاردى تىزگىندەۋ، ەندى ءبىر جاعىنان، پارتيانىڭ ساياساتتارى ارقىلى باسشىلاردى قورعاۋ ءتيىس، ولارعا جاقىننان جاردەمشى بولىپ شابىت بەرسە، باتىل ىستەۋ دەگەن بارلىق باسشىلاردىڭ سانالى تۇردە قول سوزاتىن باستى نىسانالارىنا اينالىپ، ەڭ سوڭىندا جاپپاي جالپىلاسادى.

جاۋاپتى رەداكتور:سايراش تۇرارجان قىزى