中文

حيلۇڭجياڭ ولكەلىك پارتيا، ۇكىمەت ۋاكىلدەر ۇيىرمەسىندەگىلەر التايدى كوزدەن كەشىرىپ، تەكسەرۋ زەرتتەۋ ـ جۇرگىزدى

جۇڭ چۇنچۇن، ليۋ شۋاي حابارلايدى.

10 ـ قازاننان 12 ـ قازانعا دەيىن، حيلۇڭجياڭ ولكەلىك پارتكومنىڭ تۇراقتى مۇشەسى، ۇيىمداستىرۋ ٴبولىمىنىڭ باستىعى ۋاڭ اي ـ ۋىن قاتارلىلار اۆتونوميالى رايوننىڭ ورىنباسار ٴتوراعاسى، ساياسي كەڭەستىڭ ورىنباسار ٴتوراعاسى ماعاۋ سەيتقامزا ۇلىنىڭ سەرىك بولۋىندا، التاي ايماعىنا كەلىپ شينجياڭعا باعىتتامالى كومەكتەسۋ قىزمەتىنە تەكسەرۋ ـ زەرتتەۋ جۇرگىزدى.

10 ـ قازان، حيلۇڭجياڭ ولكەسى مەن التاي ايماعىنىڭ باعىتتامالى كومەكتەسۋ قىزمەتى اڭگىمە ماجىلىسىندە، ايماقتىق پارتكومنىڭ شۋجيى جاڭ يان التاي ايماعىنىڭ قىزمەت احۋالىنان مالىمەت بەردى. جاڭ يان بىلاي دەدى: «جىل باسىنان بەرى، ايماعىمىز ٴبىر باسشىلىق القا ورنىقتىلىقتى كۇش سالا مىقتى يگەرۋ، ەندى ٴبىر باسشىلىق القا كۇشتى شوعىرلاندىرا وتىرىپ دامۋدى مىقتى يگەرۋدە تاباندى بولدى. ايماعىمىز تۇتاس شينجياڭ ٴبىرتۇتاس جۇيە يدەياسىن بەرىك تىكتەپ، اۆتونوميالى رايوندىق پارتكومنىڭ باس نىسانانى ارقاۋ ەتىپ، ‹كەشەندى شارالاردى› ويداعىداي اتقارۋ جونىندەگى جەلىلەس شەشىم مەن ورنالاستىرۋىن باتىل دايەكتىلەندىرىپ، تياناقتاندىرىپ، قوعامنىڭ جاراسىمدى ورنىقتىلىعىنا كەپىلدىك ەتتى؛ ايماعىمىز جاڭا دامۋ ۇستانىمدارىن بەرىك ورناتىپ جانە دايەكتىلەندىرىپ، ‹ٴمولدىر وزەن، جاسىل تاۋ باعا جەتپەس بايلىق، قار ـ مۇز بايلىعى دا اسىل قازىنا› دەگەندە تاباندى بولىپ، اۆتونوميالى رايوندىق پارتكومنىڭ ‹1 ـ كاسىپتىك دارەجەسىن جوعارىلاتۋ، 2 ـ كاسىپتى ٴتۇيىندى يگەرۋ، 3 ـ كاسىپتى قاۋىرت دامىتۋ› تالابى بويىنشا، ەكولوگيالىق ورتانى قورعاۋدى شىنايى مىقتى يگەرىپ، ساياحات كاسىبىنىڭ دامۋىن كۇش سالا جەبەپ، تۇراقتى مۇلىككە قارجى قوسۋدى بوساڭسىماي مىقتى يگەردى».

جاڭ يان بىلاي دەدى: «2010 ـ جىلى جاڭا كەزەكتى شينجياڭعا باعىتتامالى كومەكتەسۋ قىزمەتى باستالعاننان بەرى، حيلۇڭجياڭ ولكەلىك پارتكوم، ولكەلىك ۇكىمەت شينجياڭعا باعىتتامالى كومەكتەسۋ قىزمەتىنە وسكەلەڭ ٴمان بەرىپ، التايدىڭ ىستەرىن ٴوز ىستەرىنە بالاپ، التاي حالقىن ٴوز حالقىنداي كورىپ، قارجى، دارىندى قاتارلى جاقتاردا التايعا قالتقىسىز كومەك كورسەتتى. الدىڭعى ەكى كەزەكتى شينجياڭعا باعىتتامالى كومەكتەسۋدە ايماعىمىزعا 322 كادر ـ دارىندىنى سارالاپ جىبەرىپ، جيىنى ٴبىر ميلليارد 860 ميلليون يۋان قارجى قوستى. بيىل، باعىتتامالى كومەكتەسۋ نىسانىنان 60 ىن اتقارىپ، 136 ميلليون يۋان قارجى ورنالاستىردى. سونىمەن بىرگە، شينجياڭعا باعىتتامالى كومەكتەسۋگە كەلگەن كادرلار قوعام ورنىقتىلىعى مەن باياندى تىنشتىق باس نىساناسىن ارقاۋ ەتىپ، التايدى ٴوز مەكەندەرىنە بالاپ، التايداعى ٴار ۇلت حالقىن جاناشىر جاقىندارىنداي كورىپ، قىزمەت ورنىن قىزۋ ٴسۇيىپ، سانالىلىقپەن ىسكە كىرىسىپ، ناقتى يگەرىپ، شىنايى ىستەپ، ەڭبەكشىل ٴارى سابىرلى بولىپ، قالتقىسىز ۇلەس قوسىپ، قان تەرلەرىن توگىپ، التايدىڭ ورنىقتى دامۋىنا ماڭىزدى ۇلەستەر قوستى».

اڭگىمە ماجىلىسىندە، ماعاۋ سەيتقامزا ۇلى حيلۇڭجياڭ ولكەسىنىڭ شينجياڭعا باعىتتامالى كومەكتەسۋ قىزمەتىن تۇراقتاندىرىپ بىلاي دەدى: «جاڭا كەزەكتى شينجياڭعا باعىتتامالى كومەكتەسۋ قىزمەتى ورىستەتىلگەننەن بەرى، حيلۇڭجياڭ ولكەلىك پارتكوم، ۇكىمەت شينجياڭعا باعىتتامالى كومەكتەسۋ قىزمەتىن ماڭىزدى ساياسي مىندەت ەتىپ، ورتالىق كوميتەتتىڭ شينجياڭعا كومەكتەسۋ قىزمەت ورنالاستىرۋىن قاز ـ قالىبىندا اتقارىپ، قوعام ورنىقتىلىعى مەن باياندى تىنىشتىق باس نىساناسىن ارقاۋ ەتىپ، حالىق تۇرمىسىن ماڭداي الدى ورىنعا قويۋدى كورنەكتىلەندىرىپ، ٴار ۇلت حالقىن جاپپاي يگىلىككە كەنەلتىپ، جالپى وڭىرلىك كوپ ساتىلى باعىتتامالى كومەكتەسۋ ارقىلى بارىس ـ كەلىس، اۋىس ـ كۇيىس جاساپ، توعىسۋ دەڭگەيىن ۇزدىكسىز جوعارىلاتىپ، باعىتتامالى كومەكتەسۋدىڭ ٴتۇرلى قىزمەتىن ورنىقتى جەبەدى».

حيلۇڭجياڭ ولكەلىك پارتكومنىڭ تۇراقتى مۇشەسى، ۇيىمداستىرۋ ٴبولىمنىڭ باستىعى ۋاڭ اي ـ ۋىن بىلاي دەدى: «حيلۇڭجياڭ ولكەسى ەلىمىزدىڭ شىعىس سولتۇستىگىنە ورنالاسقان، قاريتاداعى ارالىق الىس سەزىلگەنىمەن، الايدا، حيلۇڭجياڭ ولكەسى مەن شينجياڭ تىعىز بايلانىسىپ جاتادى، ۇزاق ۋاقىتتىق بارىس ـ كەلىس، اۋىس ـ كۇيىس جاساپ توعىسۋ ەكى جەر حالقىنىڭ تەرەڭ دوستىعىن بەكەمدەدى». ۋاڭ اي ـ ۋىن بىلاي دەدى: «شينجياڭعا باعىتتامالى كومەكتەسۋ قىزمەتىن ىشكەرىلەي ورىستەتۋ _ پارتيا ورتالىق كوميتەتىنىڭ شينجياڭدى جونگە سالۋ ستراتەگياسىن دايەكتىلەندىرۋدىڭ ناقتى بەينەسى، پارتيامىز بەن ەلىمىز قىزمەتىنىڭ جالپى جاعدايىنا قىزمەت وتەۋدەگى ماڭىزدى شاراسى، شينجياڭنىڭ قوعام ورنىقتىلىعى مەن باياندى تىنىشتىعىن جۇزەگە اسىرۋدىڭ رەال قاجەتى، كادرلار دارىندىلاردىڭ ەرىك جىگەرىن شىڭداپ، قابىلەتىن ۇشتاۋدىڭ ماڭىزدى تەكشەسى. پارتيا 18 ـ قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭ قىزمەتىنە وسكەلەڭ ٴمان بەرىپ، شينجياڭ قىزمەتىن ويداعىداي ىستەۋ تۇتاس پارتيانىڭ، تۇتاس ەلىمىزدىڭ ٴىرى ٴىسى، شينجياڭعا باعىتتامالى كومەكتەسۋ مەملەكەتتىك ستراتەگيا، ٴسوزسىز، ۇزاق ۋاقىت تاباندى بولۋ قاجەت دەپ اتاپ كورسەتتى».

ۋاڭ اي ـ ۋىن مىنالاردى تالاپ ەتتى: «شينجياڭعا باعىتتامالى كومەكتەسۋگە كەلگەن كادرلار تۋى ايقىن تۇردە ساياسيدى دارىپتەپ، ‹ٴۇش ٴتۇرلى كۇشپەن› باتىل كۇرەس جاساپ، ٴتۇيىندى ساتتەردە اتويلاپ العا شىعىپ، پارتياعا باستان اقىر مۇلدە ادال بولۋى؛ ناقتى ىستەر ىستەپ ۇلەس قوسۋدى دارىپتەپ، جەرگىلىكتى ورىنداعى كادر بۇقارامەن قيىنشىلىقتا، داڭق پەن نامىستا بىرگە بولىپ، ٴىس جۇزىندىك ارەكەتى ارقىلى شينجياڭنىڭ قوعام ورنىقتىلىعى مەن باياندى تىنىشتىعىن جەبەۋى؛ باسقارۋدى قاتاڭداستىرىپ، ٴتارتىپتى دارىپتەپ، تومەنگى شەكتى ساقتاپ، قىزىل سىزىقتان اسپاي، تارتىپكە قيعاش كەلمەي، اسىرەسە حاۋىپسىزدىك تانىمى تاربيەسىن كۇشەيتىپ، ٴتۇرلى بەلگىلەمەگە قاتاڭ بويسۇنىپ، قىزمەت حاۋىپسىزدىگى مەن باس اماندىق حاۋىپسىزدىگىنە كەپىلدىك ەتۋى كەرەك. سونىمەن بىرگە، شينجياڭ مەن حيلۇڭجياڭ ەكى جەردىڭ ‹ٴبىر بەلدەۋ، ٴبىر جول› قۇرىلىسىنىڭ ۇلى امالياتىن ورتاق جەبەپ، سەلبەستىكتى جالعاستى تەرەڭدەتىپ، ابزالدىلىقتى ٴوزارا تولىقتاپ، قول ۇستاسا العا باسىپ، تاماشا تابىستاردى ورتاق جاراتۋىن ٴۇمىت ەتەمىز».

اڭگىمە ماجىلىسىندە، ايماقتىق پارتكومنىڭ مۇشەسى، 10 ـ شى بەيتۇن قالالىق پارتكومنىڭ شۋجيى، ساياسي كوميسسارى يۇي لين بەيتۇن قالاسىنىڭ ەكونوميكا، قوعام دامۋى احۋالىنان مالىمەت بەردى، ايماقتىق پارتكومنىڭ ورىنباسار شۋجيى، حيلۇڭجياڭ ولكەلىك شينجياڭعا باعىتتامالى كومەكتەسۋ الدىڭعى شەپ قولباسشىلىق ىشتابىنىڭ باس قولباسشىسى لي بيڭ شينجياڭعا باعىتتامالى كومەكتەسۋ قىزمەتى احۋالىنان مالىمەت بەردى.

قادەن كابەن ۇلى، داي جيانشين، اقان سەيتقامزا ۇلى، لي بيڭ، يۇي لين، چىن بو، ما شۋەلياڭ قاتارلى ايماق باسشىلارى اڭگىمە ماجىلىسىنە قاتىناستى.

حيلۇڭجياڭ ولكەلىك پارتيا ۇكىمەت ۋاكىلدەر ۇيىرمەسىندەگىلەر ايماعىمىزدىڭ شينجياڭعا باعىتتامالى كومەكتەسۋ كادرلار عيماراتىنا كەلىپ، ٴبىرىنشى شەپتە قىزمەت ىستەپ جاتقان شينجياڭعا باعىتتامالى كومەكتەسۋگە كەلگەن كادر ـ دارىندىلاردان حال سۇراپ، ولاردىڭ قىزمەت، تۇرمىس احۋالىن ۇعىستى ٴارى شينجياڭدا قالىپ مىندەت وتەپ جاتقان كادرلارمەن اڭگىمە ٴماجىلىسىن وتكىزدى.

11 ـ قازاننان 12 ـ قازانعا دەيىن، حيلۇڭجياڭ ولكەلىك پارتيا ۇكىمەت ۋاكىلدەر ۇيىرمەسىندەگىلەر ەكى گرۋپپاعا ٴبولىنىپ بەيتۇن قالاسى، بۋرىلتوعاي اۋدانى، شىڭگىل اۋدانى، كوكتوعاي اۋدانى قاتارلى جەرلەرگە بارىپ شينجياڭعا باعىتتامالى كومەكتەسۋ قىزمەتى احۋالىن كوزدەن كەشىردى.

ايماقتىق حالىق شيپاحاناسىندا شينجياڭعا باعىتتامالى كومەكتەسۋ ماماندارىنىڭ جاتاق قۇرىلىسى احۋالىن كوزدەن كەشىرگەن كەزدە، ۋاڭ اي ـ ۋىن بىلاي دەدى: «حيلۇڭجياڭ ولكەسىنىڭ ٴۇشىنشى توپتاعى شينجياڭعا باعىتتامالى كومەكتەسۋ قىزمەتىنىڭ جاپپاي ورىستەتىلۋى، التاي مەن حيلۇڭجياڭ ولكەسىن تىعىز بايلانىستىردى. شينجاڭعا باعىتتامالى كومەكتەسۋ قىزمەتىن ورىستەتۋ ارقىلى التايداعى ەگىنشى ـ مالشىلاردى ەمدەۋ دەنساۋلىق ساقتاۋ قىزمەت وتەۋىمەن اناعۇرلىم ويداعىداي جالعاستى قامداپ، جەرگىلىكتى شيپاحانانىڭ ەمدەۋ تەحنيكالىق دەڭگەيىن ۇزدىكسىز جوعارىلاتىپ، تەحنيكالىق دارىندىلاردى تاربيەلەپ، التايداعى ٴار ۇلت حالقىنا باقىت جاراتۋعا كومەكتەسەمىز».

پارتيا ۇكىمەت ۋاكىلدەر ۇيىرمەسىنىڭ 2 ـ گرۋپپاسى بۋرىلتوعاي اۋدانىنا بارىپ، باتىس قالا رايونى «قوس ٴتىل» بالالار باقشاسى، 3 ـ تولىق ورتا مەكتەپ، 1 ـ ەگىس الاڭى ەمحاناسى، شينجياڭعا باعىتتامالى كومەكتەسۋ عيماراتىنا بارىپ تەكسەرۋ ـ زەرتتەۋ جۇرگىزدى. شىڭگىل اۋدانىندا 2 ـ باستاۋىش مەكتەپ، جالپىلىق تاربيەلەۋ ورتالىعى، شينجياڭعا باعىتتامالى كومەكتەسۋ عيماراتى، اۋداندىق حالىق شيپاحاناسىن كوزدەن كەشىردى. ۋاكىلدەر ۇيىرمەسىندەگىلەر ٴارقايسى كوزدەن كەشىرۋ تۇيىندەرىنىڭ نەگىزگى قۇرىلىسى مەن اينالىمى قاتارلى احۋالداردان جاسالعان مالىمەتتى تىڭداعاننان كەيىن، بۋرىلتوعاي اۋدانىنداعى، شىڭگىل اۋدانىنداعى شينجياڭعا باعىتتامالى كومەكتەسۋ قىزمەتكەرلەرىنەن حال سۇراپ، ولارمەن اڭگىمەلەسىپ، ولاردىڭ التايداعى قىزمەتتەرىن تولىق تۇراقتاندىردى. ٴارى ولاردىڭ ۇلەس قوسۋ رۋحىن ماداقتاپ، ولاردى التايدىڭ ٴتۇرلى ىستەرىنىڭ دامۋى ٴۇشىن ٴوز ۇلەستەرىن قوسۋعا شابىتتاندىردى.

ايماق باسشىلارىنان گۇلنۇر نۇرعالي قىزى، چىن بو تەكسەرۋ ـ زەرتتەۋدە بىرگە بولدى.

اۋدارعان: گۇلجان كوكەناي قىزى

جاۋاپتى رەداكتور: قابىلقان ايتقابىل ۇلى
جايمالاۋ