中文

التاي قالاسى قىسقى ساياحاتقا دەن قويا دايىندالدى

قىسقى ساياحات جەللەس قيمىلدارى 28 ـ قازاندا باستالاتىن كورىنەدى

دۋ پىڭفەي حابارلايدى. 6 ـ قازاندا، ءتىلشى التاي قالالىق پارتكوم ۇگىت بولىمىنەن ۇعىسۋىنشا، قىس تۇسۋدەن بۇرىن، التاي قالاسى قىسقى ساياحاتتىڭ دايىندىعىنا كىرىسە باستاعان. مەجەمەن 28 ـ قازاننان باستاپ، قىسقى ساياحاتتىڭ جەلىلەس قيمىلدارىن باستايتىن كورىنەدى.

ءتىلشىنىڭ التاي قالالىق ساياحات مەكەمەسىنەن ۇعىسۋىنشا، بيىل التاي قالاسى گەنارال تاۋى قار شاڭعى الاڭىنا جالپى ۇزىندىعى 1400 مەتر كەلەتىن ساياحاتشىلاردى تاسىمالدايتىن اسپالى كۇيمە جولىن اشۋمەن بىرگە، ەكى ورىنداعى قاردا سىرعاناۋ جولىن كەڭەيتەدى ەكەن. قار جاساۋ جۇيەسى مەن كەشكى شىراق نىساندارىن كەمەلدەندىرىپ، قار الاڭىنىڭ وڭتۇستىك، تەرىستىك بەتكەيىندەگى قار شاڭعى جولىن كەڭەيتىپ، كەڭەيتكەننەن كەيىنگى شاڭعى جولىنىڭ جالپى اۋماعىن ءبىر ميلليون 290 مىڭ شارشى مەترگە جەتكىزىپ، شاڭعى جولىنىڭ جالپى سانىن 51 گە ، جالپى ۇزىندىعىن 40 كيلومەترگە جەتكىزەدى ەكەن. تۇگەلدەي ىسكە قوسىلعاننان كەيىن، وسى قار شاڭعى الاڭىنىڭ وڭتۇستىك بولەگىندەگى جوعارى دارەجەلى قار شاڭعى جولى حالىقارالىق قار شاڭعى جارىستارىنا پايدالانۋعا بولادى ەكەن.

التاي قالالىق ساياحات مەكەمەسىنىڭ باستىعى شى جىچياڭ بىلاي دەدى: «بيىل گەنارال تاۋى قار شاڭعى الاڭىنا شيۆەتسيادان وندىرىلگەن جوعارى قارقىندى اسپالى كۇيمە ەنگىزدىك. ساعاتىنا 2000 ادام تاسيدى، ساياحاتشىلاردىڭ تاۋ شوقىسىنا شىعۋ ۋاقىتى بۇرىنعى 20 مينۋتتان 6 مينۋتقا قىسقارادى. گەنارال تاۋى قار شاڭعى الاڭى تاعى جاساندى جولمەن قار جاساۋ جۇيەسىنىڭ دارەجەسىن جوعارىلاتىپ، جاساندى جولمەن قار جاساۋ ۋاقىتىن 20 كۇن اينالاسىندا قىسقارتادى».

«29 ـ قىركۇيەكتە، ونەر جۇلدىزدارىنىڭ قالالارعا دانەكەر بولۋى _ـ سان عاسىرلىق قار ـ مۇز رۋحىن جانداندىرىپ، قارشاڭعى مەكەنىندە قاسيەتتى الاۋدى تۇتاندىرۋ» قيمىلى بەيجيڭدە اقپار جاريالاۋ ءماجىلىسىن جانە جۇگىرۋ سالتىن وتكىزۋى التايدىڭ 2017 ـ جىلعى قىسقى ساياحات جەلىلەس قيمىلىنىڭ باستالعانىنان دەرەك بەرەدى. 28 ـ قازاندا، التاي قالاسى عاسىرلىق قار ـ مۇز الاۋىن تۇتاندىرىپ، قىسقى ساياحاتتىڭ پەردەسىن رەسمي اشادى»، ـ دەدى التاي قالالىق پارتكوم ۇگىت ءبولىمىنىڭ سىرتقى ۇگىت كەڭسەسىنىڭ مەڭگەرۋشىسى ياڭ كايجيڭ .

سوڭعى جىلداردان بەرى، ايماعىمىزدىڭ قىسقى ساياحات جەلىلەس قيمىلىن دامىتۋ، ۇگىتتەۋ، جەتىلدىرۋىنە ىلەسە، التايدىڭ قىسقى قار ـ مۇز ساياحاتىنىڭ ايگىلىلىك، كوركەمدىك دەڭگەيى، ىقپال قۋاتى مەن تارتىمدىلىق قۋاتى ۇزدىكسىز كۇشەيىپ، اناعۇرلىم كوپ ساياحاتشىلاردىڭ قولداۋىنا يە بولدى. بيىل التاي قالاسى قار ـ مۇز سپورتىن نەگىز ەتىپ، التاي قالاسىنىڭ 15 ـ كەزەكتى قار ـ مۇز سالت ـ سانا ساياحاتىن باستاۋ سالتى مەن التاي قالاسىنىڭ گەنارال تاۋىندا تۇڭعىش قار شاڭعى تەبۋ قيمىلىن، 2017 ـ جىلدان 2018 ـ جىلعا دەيىنگى جۇڭگو التاي حالىقارالىق قار ـ مۇز ساياحاتىنىڭ پەردەسىن اشۋ سالتىن جانە 11 ـ كەزەكتى ادامزاتتىڭ بايىرعى قار شاڭعى مەكەنىن ەسكە الۋ كۇنىن قۇتتىقتاۋ جەلىلەس قيمىلىن، 11 ـ كەزەكتى التاي قالاسىنىڭ ءدامدى تاعامدار جارىسىن، 10 ـ كەزەكتى التاي حالىقارالىق مۇز ويما باسەكەسىن، حالىقارالىق قاردا سىرعاناۋ، تاۋعا شىعۋ جارىسىن، يەن دالاداعى قارلى باقشادا شاڭعى تەبۋ سالتىن وتكىزۋ قاتارلى جەلىلەس قيمىلداردى ورىستەتەدى.

اۋدارعان: ناعيما ءتۇسىپنابي قىزى

جاۋاپتى رەداكتور: قابىلقان ايتقابىل ۇلى
جايمالاۋ