中文

اپەكەلى - ءسىڭلىلى ۇشەۋى تۋعان «اعا - جەڭگەسىن» تاپتى

گازەتىمىزدىڭ تارباعاتاي تىلشىلەر پۋنكتىندە تۇراتىن ءتىلشىسى ليۋ پىڭ حابارلايدى.

8 - قازاندا ءدوربىلجىن اۋدانى قارا ەمىل قالاشىعى ويىنكى قىستاعىندا ەرلى - زايىپتى لي يۇيشۋە مەن جاڭ لي قازاق ۇلتىنىڭ سالتى بويىنشا، «وتاعاسى» سالاۋاتىمەن قىزدارى گۇلدەن سيازبەك قىزىن ءۇشقاراسۋ قالاشىعى قاراسۋ 2 - قىستاعىنا ۇزاتتى.

  لي يۇيشۋە ەرلى - زايىپتىلاردىڭ اپەكەلى - ءسىڭلى ۇشەۋىنە بولعان مەيىرى ءبىر جىلدان بەرى ەل اۋزىنداعى ەلەۋلى اڭگىمەگە اينالدى.

  بىلتىر تارباعاتاي ايماعى مەملەكەتتىك جەر بايلىعى مەكەمەسىنىڭ قىزمەتكەرى لي يۇيشۋە «ۇلتتار ىنتىماعىنىڭ بەرەكەلى شاڭىراعى» قيمىلى بويىنشا سيازبەك قارتتىڭ 3 قىزىمەن جۇپ قۇراپ تۋىس بولادى.

  بۇل اپەكەلى - ءسىڭلىلى ۇشەۋى كىشكەنتاي كەزدەرىندە - اق قوس قورمالدارىنان ايرىلسا دا پارتيانىڭ سارا ساياساتنىڭ مەيىر - شاپاعاتىندا، قىستاق كادرلارى مەن قىستاق تۇرعىندارىنىڭ قامقورلىعىندا، كومەكتەسۋىندە امان - ەسەن ەرجەتكەن.

  «وسى وتباسىنا مەن باس - كوز بولۋىم كەرەك». العاش رەت تانىسىپ، تۋىس بولعاننان كەيىن «وتاعاسىلىق» جاۋاپكەرلىگىن ۇستىنە العان لي يۇيشۋە تەلەفون ءنومىرىن قالدىرىپ، ولارعا قايتا - قايتا: قانداي ءىس بولسا دا ماعان حابارلاسىڭدار، - دەيدى.

  سودان باستاپ، اپەكەلى - ءسىڭلىلى ۇشەۋىنىڭ لي يۇيشۋە اتتى اعاسى مەن جاڭ لي اتتى جەڭگەسى بولادى.

  «اعا - جەڭگەمىز اراعا 10 − 15 كۇن سالىپ، بىزگە كوكونىس، جەمىس - جيدەك، ۇن، ماي قاتارلى تۇرمىستىق بۇيىمدار اكەلىپ تۇرادى. وسىنىڭ وزىنە ءبىر جىلدا 3000 يۋاننان ارتىق اقشا جۇمساپ، ءبىزدىڭ قيىنشىلىق قىسپاعىنان قىسىلماي وتۋىمىزگە كومەكتەستى». اپەكەلى - ءسىڭلىلى ۇشەۋىنىڭ ايتىپ تاۋىسقىسىز العىستارىن وسىلاي جەتكىزدى.

  بيىل جىل باسىندا لي يۇيشۋە «ۇعىسۋ، تيىمدىلىك جاساۋ، توعىستىرۋ» قيمىلى بويىنشا قىستاقتا تۇرۋعا ىرىقتىلىقپەن قاتىناسىپ، ويىنكى قىستاعىندا تۇراتىن قىزمەت اترەتىنىڭ ورىنباسار باستىعى بولىپ كەلەدى، اپەكەلى - ءسىڭلىلى ۇشەۋىنە قارايلاسۋ ىسىنە ءتىپتى دە ىڭعايلى بولادى.

  گۇلدەننىڭ ءسىڭلىسى بۇرلەن سيازبەك قىزى 12 جاس كەزىندە اۋرۋعا شالدىعىپ، ەكى قۇلاعى كەرەڭ بولىپ قالادى. ولاردىڭ وتباسىنىڭ ەكونوميكالىق اۋىرتپالىعىن جەڭىلدەتۋ ءۇشىن، لي يۇيشۋە دوستارىنا حابارلاسىپ، بۇرلەنگە شاۋەشەك قالاسىنداعى ءبىر ازىق - تۇلىك دۇكەنىنەن 2000 يۋاندىق ايلىعى بار قىزمەت تاۋىپ بەرەدى. بيىل اقپاندا بۇرلەننىڭ ەكى قۇلاعى اۋىرىپ، قاندى ءىرىڭ اعادى، لي يۇيشۋە وعان وپەراتسيا اقىسىن توپتاۋ ءۇشىن جان - جاققا شاپقىلاپ ءجۇرىپ، مەملەكەتتىڭ سالماقتى ناۋقاستاردى قۇتقارۋ، ەمدەۋ قاراجاتىنان 30 مىڭ يۋاندى ءوتىنىش ەتىپ الىپ بەرەدى. لي يۇيشۋە بىلاي دەدى: وسى اقشاعا ءوزىم اتاعان 2000 يۋاندى جانە قوعامنان جينالعان 2000 يۋاندى قوسىپ، بۇرلەندى ۇرىمجىگە اپارىپ ەمدەتتىك. بۇرلەننىڭ دەنساۋلىعى قالپىنا كەلگەننەن كەيىن، ءبىز تاعى دا 30 مىڭ يۋان جيناپ، وعان ءدوربىلجىن اۋدانىنان ءبىر بولكا دۇكەنىن اشىپ بەرۋدى، سول ارقىلى كىرىسىن ارتتىرۋدى جوسپارلاپ وتىرمىز.

  لي يۇيشۋە گۇلدەننىڭ ەندى ءبىر ءسىڭلىسى ايساۋلە سيازبەك قىزىنا دا قالتقىسىز كومەك قولىن سوزادى. بيىل كوكتەمدە ايساۋلەگە قاتتى تۇماۋ تيەدى، لي يۇيشۋە ونى ءوز كولىگىمەن دەرەۋ قالاشىق ەمحاناعا جەتكىزىپ، بالنيتساعا جاتقىزادى ءارى ونىڭ بارلىق ەمدەۋ قاراجاتىن تولەيدى. دەنساۋلىعى قالپىنا كەلگەن ايساۋلە 2017 - جىلعى ارنايى وقىتۋشى قابىلداۋ ەمتيحانىنا قاتىناسادى، الايدا بەتپە - بەت ەمتيحاننان وتە الماي قالادى. لي يۇيشۋە ونى ءدوربىلجىن اۋداندىق دەنساۋلىق ساقتاۋ سالاسى ەمتيحانىنىڭ تاربيەلەۋ كۋرسىنا قاتىناسۋعا شابىتتاندىرادى. بيىل قاراشادا ايساۋلە دەنساۋلىق ساقتاۋ سالاسىنا قىزمەتكە تۇرىپ، قىستاق شيپاگەرلىك جۇمىسىن باستاپ، ءوز ارمانىن ىسكە اسىرادى.

  گۇلدەن ءۇيدىڭ ۇلكەنى بولعاندىقتان، تالاي جىلداردان بەرى 2 سىڭلىسىنە قارايلاسامىن دەپ، ءوزىنىڭ ومىرلىك ءىسىن دە ويلاسپاعان ەدى. بيىل ماۋسىم ايىندا ءدوربىلجىن اۋدانى ءۇشقاراسۋ قالاشىعى قاراسۋ 2 - قىستاعىنىڭ تۇرعىنى تۇماربەك داۋەن ۇلىمەن ءسوز بايلاسادى.

  توي كەزىندە گۇلدەن كوزىنە ىستىق جاس الىپ: مەنىڭ حانزۋ « اعام» ءبىز ءۇشىن از تەر توككەن جوق... بىرگە تۋماساق تا ءبىر تۋعانداي بولىپ كەتتىك، ءبىز ءومىر بويى وسى كىسىلەردىڭ جاقسىلىعىن ۇمىتپايمىز! -دەدى.

جاۋاپتى رەداكتور: قابىلقان ايتقابىل ۇلى
جايمالاۋ