中文

قارىز الۋشى قايتىس بولسا، قارىزىن كىم قايتارادى

دەلو بايان

2015 - جىلى 4 - ساۋىردە گىڭ xx بەلگىلى ءبىر امانات - قارىز كووپەراتيۆىنەن 20 مىڭ يۋان قارىز الادى، ۋ xx قاتارلى 5 ادام وعان كەپىل بولادى. كەيىن گىڭ xx قارىز اقشانى قايتارماعاندىقتان، قارىز بەرگەن امانات - قارىز كووپەراتيۆى گىڭ xx پەن ونىڭ قارىز الۋىنا كەپىل بولعان 5 ادامنىڭ ۇستىنەن ءۇرىمجى اۋداندىق حالىق سوتى مەكەمەسىنە ارىز بەرەدى. سوت مەكەمەسى گىڭ xxتىڭ قارىز اقشانى وسىمىمەن قوسىپ قايتارۋىن، كەپىل بولعان 5 ادامنىڭ ىلىكتەس كەپىلدىك جاۋاپكەرشىلىگىن ارقالاۋىن بۇيىرادى.

كوپ وتپەي گىڭ xx قايتىس بولىپ، 2 ۇلى ونىڭ مال - مۇلكىنە مۇراگەرلىك ەتەدى، ءبىراق ونىڭ قارىزىن قايتارمايدى.

2016 - جىلى شىلدەدە گىڭ xxتىڭ قارىزى مەن ءوسىمىن قايتارۋعا ۋ xxتىڭ بانكە كارتچكاسىنان 36 مىڭ يۋاننان استام اقشا تارتىلادى. ۋ xx گىڭ xxتىڭ 2 ۇلىنان جانە كەپىل بولعان باسقا 4 ادامنان تولەم جاۋاپكەرشىلىگىن ورتاق كوتەرۋدى تالاپ ەتەدى، ءبىراق ولار بۇدان باس تارتادى.

بيىل اقپاندا ۋ xx اتالعان 6 ادامنىڭ ۇستىنەن ءۇرىمجى قالاسى ميدۇڭ رايوندىق حالىق سوتى مەكەمەسىنە ارىز بەرىپ، 6 ادامنىڭ ءوزىنىڭ گىڭ xx ءۇشىن قايتارعان نەگىزگى سوماسى مەن ءوسىمىن قايتارىپ بەرۋىن تالاپ ەتەدى.

كەپىل بولعان باسقا 4 ادام بۇل قارىزدى «قارىز الۋشىنىڭ مۇراگەرلەرى قايتارۋى ءتيىس» دەسە، ال گىڭ xxتىڭ ۇلدارى «ءبىز تەك قارىز العان نەگىزگى سوما 20 مىڭ يۋاندى عانا قايتارامىز، ءوسىمىن ارقالامايمىز»، - دەيدى.

زاڭدىق تۇسىندىرمە

ميدۇڭ رايوندىق حالىق سوتى مەكەمەسىنىڭ سوتشىسى ەسىمحان بىلاي دەدى: «جۇڭحۋا حالىق رەسپۋبليكاسىنىڭ مۇراگەرلىك زاڭىندا» «مال - مۇلىككە مۇراگەرلىك ەتۋدە مۇرا يەسىنىڭ زاڭ بويىنشا تاپسىرۋعا ءتيىستى باجىسى مەن قارىزىن تولەۋى كەرەك. باجى تولەۋ مەن قارىز قايتارۋ ميراستىڭ ناقتى قۇنىمەن شەكتەلەدى» دەپ ايقىن بەلگىلەنگەن. «جۇڭحۋا حالىق رەسپۋبليكاسىنىڭ كەپىلدىك زاڭىندا» «كەپىل بولعان ادام كەپىلدىك مىندەتىن ادا ەتىپ، قارىز الۋشى ءۇشىن قارىزدى تولەگەننەن كەيىن، بۇل اقشانى قارىز الۋشى ادامعا تولەتىپ الۋعا ۇقىقتى» دەپ بەلگىلەنگەن.

جوعارىداعى زاڭدىق بەلگىلەمەلەرگە نەگىزدەلىپ، ۋ xx حالىق سوتى مەكەمەسى ارقىلى گىڭ xxكە اتقارتاتىن قارىز سوماسى مەن ءوسىمىن قايتارۋى سياقتىلاردى گىڭ xxتىڭ مۇراگەرلەرىنەن تولەپ بەرۋىن تالاپ ەتۋگە ۇقىقتى. ۋ xxتىڭ گىڭ xxتىڭ 2 ۇلىنان اكەسى ءۇشىن تولەگەن اقشانى قايتارىپ بەرۋدى تالاپ ەتكەن ارىزىن حالىق سوتى مەكەمەسى قولدايدى.

«ەڭ جوعارى حالىق سوتى مەكەمەسىنىڭ جۇڭحۋا حالىق رەسپۋبليكاسىنىڭ كەپىلدىك زاڭىن قولدانۋداعى ءبىرقانشا ماسەلەلەرگە تۇسىندىرمەسىندە» «ىلىكتەس بىرگە كەپىلدىك ەتۋشى ءوزى كەپىلدىك ەتكەن قارىز سومانى تولەۋ مىندەتىن ۇستىنە العاننان كەيىن، قارىز الۋشىدان وندىرە الماعان بولەگىن ءارقايسى ىلىكتەس كەپىلدىك ەتۋشى سول كەزدە ءوز ىشتەرىندە كەلىسكەن سالىستىرما بويىنشا ءبولىپ كوتەرەدى. ەگەر ول كەزدە كەلىسىم بولماسا، تەڭ ءبولىپ كوتەرەدى» دەپ بەلگىلەنگەن.

حالىق سوتى مەكەمەسى گىڭ xxتىڭ 2 ۇلىنا ۋ xxتىڭ گىڭ xx ءۇشىن تولەگەن 36 مىڭ يۋاننان استام اقشاسىن قايتارىپ بەرۋىن، باسقا كەپىل بولعان 4 ادامنىڭ قالعان اقشانى ءارقايسىسى %25تىك سالستىرما بويىنشا قايتارۋ جاۋاپكەرشىلىگىن ۇستىنە الۋلارىن ۇكىم ەتتى.

   «شينجياڭ زاڭ گازەتىنەن»

   اۋدارعان: ايجان مۇراتبەك قىزى

جاۋاپتى رەداكتور: جانار قاناپيا قىزى
جايمالاۋ