中文

ەلەكتروسيكل جۇرگىزۋدەن تۋعان شىرعالاڭدى موتورلى كولىك شىرعالاڭى بويىنشا ءبىر جاقتى ەتۋگە بولا ما

جوۋ رۇيپيڭ، تان دىجۇن، ياڭ جۇن

سوڭعى جىلدارى ەلەكتروسيكل جاڭاشا قاتىناس قۇرالى رەتىندە اۋىل - قالاعا كەڭ تارالىپ، ەلەكتروسيكلگە سايعان قاتىناس شىرعالاڭى جىلدان - جىلعا كوبەيدى. ەلىمىزدە قازىر اتقارىلىپ وتىرعان زاڭ - ەرەجەلەردە ەلەكتروسيكل باسقارۋ جاعى بوس قالعاندىقتان، ەلەكتروسيكل شىرعالاڭىنداعى تولەم جاۋاپكەرشىلىگى داۋ - شارىن ءبىر جاقتى ەتۋ جاعىندا پىكىر بىركەلكى بولماي، ءبىرتالاي ماسەلە ءوربىدى. جۋىردا انحۇي ولكەسى نيڭگو قالالىق حالىق سوتى مەكەمەسى قاراعان ءبىرسىپىرا قاتىناس شىرعالاڭى داۋ - شارىندا شىرعالاڭ تۋدىرعان ەلەكتروسيكلدى قاتىناس ساقشى تاراۋلارى موتورلى كولىك دەپ ساراپتاعان، ونداعى تالاپكەردىڭ ءبارى جاۋاپكەر جاقتان قاتىناس زورلىقتى قامسىزداندىرۋى كولەمىندە الدىمەن زياندى تولەۋدى تالاپ ەتكەن. ەندەشە، ءادىليا امالياتى بارىسىندا وسى تەكتەس داۋ - شارلاردى قالاي ءبىر جاقتى ەتكەن ءجون؟

ولشەمنەن اسقان ەلەكتروسيكل جۇرگىزۋدەن شىرعالاڭ تۋعاندا قاتىناس زورلىقتى قامسىزداندىرۋى كولەمىندە تولەم بەرۋ قيىن

2015 - جىلى 12 - ماۋسىمدا نيڭگو قالاسىنىڭ تۇرعىنى حۋا xx ايەلى ليۋ xxتى ەلەكتروسيكلگە مىنگەستىرىپ، باتىس جينحى داڭعىلىنان شىعىسقا قاراي كەتىپ بارا جاتقاندا، الدىڭعى جاعىنداعى جولدان وڭعا قاراي كولدەنەڭ وتە شىقپاقشى بولعان جاڭ xxكە سوعىلىپ، قاتىناس شىرعالاڭى تۋىلادى، جاڭ xx، حۋا xx جارالانىپ، كولىك بۇلىنەدى. جاڭ xxتىڭ وڭ جاق ورتان جىلىگى جارقاشتانىپ سىنىپ، كەيىن ءادىليالىق ساراپتاۋدا «وڭ جاق اياعى زاقىمدالىپ، 10 - دارەجەلى مۇگەدەك بولدى» دەگەن قورىتىندى شىعادى. قاتىناس ساقشى اترەتى: حۋا xx باستى جاۋاپكەرشىلىكتى، جاڭ xx قوسىمشا جاۋاپكەرشىلىكتى ارقالايدى، - دەپ تۇراقتاندىرادى.

جاڭ xx نيڭگو قالالىق حالىق سوتى مەكەمەسىنە ارىز بەرىپ، ءوزىنىڭ 120 مىڭ يۋاننان ارتىق ەكونوميكالىق زيانى ءۇشىن جاۋاپكەر حۋا xx پەن ليۋ xxتى ىلىكتەس تولەم بەرۋگە ۇكىم ەتۋدى تالاپ ەتەدى.

ەكى جاۋاپكەر شىرعالاڭ تۋدىرعان كولىكتىڭ جوندەۋ كەپىلدىك كارتچكاسى مەن ۋاقىتتىق جولحاتىن سوتقا كورسەتىپ، جۇرگىزگەندەرىنىڭ موتورلى كولىك ەمەس، ەلەكترو ۆەلوسيپەد ەكەنىن دالەلدەمەك بولدى.

تالاپكەر «دەلوعا سايعان كولىك ەلەكتروسيكل دەپ تىزىمگە الىنعانىمەن، قۋاتى ۇلكەن بولعاندىقتان موتورلى كولىككە جاتادى؛ ۋاقىتتىق جولحاتى جارامدىلىق مەرزىمىنەن ءوتىپ كەتكەن، جىلدىق ساراپتاۋدان وتكىزىلمەگەن، حاۋىپسىز ەمەس؛ كولىك جوندەۋ كەپىلدىك كارتچكاسىن موتورلى كولىك تيبىنىڭ نەگىزى ەتۋگە بولمايدى» دەپ قاراپ، قاتىناس زورلىقتى قامسىزداندىرۋى كولەمىندە الدىمەن زياندى تولەۋدى تالاپ ەتەدى.

حالىق سوتى مەكەمەسىنىڭ تەكسەرىپ انىقتاۋىنشا، دەلوعا سايعان كولىكتى تىزىمگە الدىرعان ادام ليۋ xx بولىپ، نيڭگو قالالىق قوعام حاۋىپسىزدىگى مەكەمەسىنىڭ قاتىناس باسقارۋ اترەتى كولىك تيبىن ولشەمنەن اسقان ەلەكتروسيكل (جەڭىل تۇرپاتتى موتوتسيكل) دەپ تۇراقتاندىرعان، كولىك يەسى قاتىناس زورلىقتى قامسىزداندىرۋىن ساتىپ الماعان.

حالىق سوتى مەكەمەسى بىلاي دەپ قارادى: جاڭ xx جول قاتىناس شىرعالاڭىنا ۇشىراۋ سالدارىنان جارالانعاندىقتان، بۇدان كەلگەن زياندى ۇقىققا قول سۇعۋشى شىرعالاڭ جاۋاپكەرلىگىنە ساي تولەۋ كەرەك. شىرعالاڭداعى قوسىمشا جاۋاپكەرشىلىكتى جاڭ xx، باستى جاۋاپكەرشىلىكتى حۋا xx ارقالايتىندىقتان، شىرعالاڭ تۋدىرعان كولىكتى قاتىناس ساقشى اترەتى موتورلى كولىك دەپ تۇراقتاندىردى، سوندىقتان جاعدايعا قاراي جاۋاپكەر حۋا xxكە تالاپكەر تارتقان زيانىنىڭ %80ىن تولەتۋ كەرەك. تالاپكەر 10 - دارەجەلى مۇگەدەك بولىپ، رۋحاني جاقتان ەداۋىر ازاپ شەكتى، سوندىقتان حالىق سوتى مەكەمەسى تالاپكەر دارىپتەگەن 4000 يۋان رۋحاني جۇباتۋ قاراجاتىن قولدادى.

سونىمەن بىرگە، شىرعالاڭ تۋدىرعان كولىكتى موتورلى كولىك دەپ تۇراقتاندىرعانىمەن، اماليات بارىسىندا اكىمشىلىك باسقارۋ تاراۋلارى ەلەكتروسيكلدى موتورلى كولىك باسقارۋ ءادىسى بويىنشا باسقارمايدى، ولشەمنەن اسقان ەلەكتروسيكل موتورلى كولىكتى تىزىمگە الدىرۋ شارتىنا ۇيلەسپەيدى، وعان قاتىناس زورلىقتى قامسىزداندىرۋىن ساتىپ الۋعا كەلمەيدى، دەمەك، تالاپكەردىڭ قاتىناس زورلىقتى قامسىزداندىرۋى كولەمىندە تولەم بەرۋدى تالاپ ەتكەن پىكىرى قابىلدانبادى.

تالاپكەر ارىزىندا جاۋاپكەر ليۋ xxتىڭ ىلىكتەس جاۋاپكەرلىك ارقالاۋىن تالاپ ەتتى. ليۋ xx شىرعالاڭ تۋدىرعان كولىكتىڭ تىزىمگە الدىرۋشىسى بولعانىمەن، تالاپكەر جاۋاپكەر ليۋ xxتىڭ وسى شىرعالاڭدا اعاتتىعى بار ەكەنىن دالەلدەيتىن سىپات كورسەتپەگەندىكتەن، حالىق سوتى مەكەمەسى تالاپكەردىڭ بۇل ارىز تالابىن قولدامادى. سونىمەن حالىق سوتى مەكەمەسى حۋا xxتى تالاپكەر جاڭ xxتىڭ قاتىناس شىرعالاڭىنان كەلگەن ەكونوميكالىق زيانى مەن رۋحاني جۇباتۋ قاراجاتى ءۇشىن وعان جيىنى 76 مىڭ يۋان تولەم بەرۋگە ۇكىم ەتتى.

ەلەكتروسيكلدى موتورلى كولىك دەپ ساراپتاۋ جاۋاپكەرشىلىكتى ايىرۋعا ىقپال جاسامايدى

2015 - جىلى 20 - قاڭتار تۇستەن كەيىن حۋ xx «بيۋك» ماركالى اۆتوكولىكپەن تەز قارقىندى تۋنەلدە ۇشىرتىپ كەلە جاتىپ جول ايىرىعىنا تاياي بەرگەندە، چىن xxتىڭ سولعا بۇرىلىپ كەلە جاتقان ەلەكتروسيكلىن بۇيىردەن جاناي سوعىپ شىرعالاڭ تۋادى، ناتيجەدە چىن xx جارالانىپ، ەكى جاقتىڭ كولىكتەرى بۇلىنەدى. چىن xxتىڭ جارالانۋ جاعدايىنا جۇرگىزىلگەن ءادىليالىق ساراپتاۋدا ميدىڭ سىرتقى جاراقاتىنان 1 - دارەجەلى مۇگەدەك بولىپ، بۇكىلدەي كۇتىمدەۋگە سۇيەنەتىنى انىقتالادى.

قاتىناس ساقشى اترەتى: حۋ xx شىرعالاڭداعى باستى جاۋاپكەرشىلىكتى، چىن xx قوسىمشا جاۋاپكەرشىلىكتى ارقالايدى، - دەپ تۇراقتاندىردى.

چىن xx نيڭگو قالالىق حالىق سوتى مەكەمەسىنە ارىز بەرىپ، ءوزىنىڭ ءتۇرلى شىعىنىن قوسقانداعى ءبىر ميلليون 120 مىڭ يۋاندى حۋ xx جانە ونىڭ مەكەمەسى، قامسىزداندىرۋ سەرىكتەستىگى سىندى 3 جاۋاپكەردىڭ تولەۋىن تالاپ ەتەدى.

جاۋاپكەر حۋ xx بىلاي دەپ داۋ ايتادى: بۇل دەلودا جول شىرعالاڭىنداعى جاۋاپكەرلىكتىڭ تۇراقتاندىرىلۋى انىق ەمەس ءارى زاڭدىق نەگىزى جوق. شىرعالاڭ تۇراقتاندىرماسىندا تالاپكەر جۇرگىزگەن كولىك موتورسىز كولىك دەپ تۇراقتاندىرىلعان، ءبىراق ساراپتاۋ قورىتىندىسىندا موتورلى كولىك دەلىنگەن. جول - قاتىناس حاۋىپسىزدىگى زاڭى مەن قاتىستى زاڭ - ەرەجەدەگى بەلگىلەمەلەرگە نەگىزدەلگەندە، تالاپكەردە زاڭ - ەرەجەگە قايشىلىق جاساۋ جايتى بار، ونىڭ ۇستىنە كولىكتى كۋالىكسىز، حاۋىپسىزدىك قالپاعىن كيمەي جۇرگىزگەن. باعدار كورسەتكىش شىراق جوق جول ايىرىعىندا سولعا بۇرىلعاندا، تالاپكەر جول اۋزىنىڭ ورتالىق تۇسىمەن جۇرمەگەن، سونداي - اق قارسى كەلە جاتقان كولىكتىڭ الدىمەن وتۋىنە جول بوساتپاعان، ياعني سولعا بۇرىلا بەرىپ، ءتۇزۋ سىزىق بويىمەن كەلە جاتقان مەنىڭ اۆتوكولىگىمدى بۇيىردەن جاناي سوققان، دەمەك، تالاپكەردىڭ كولىكتى جونىمەن جۇرگىزبەۋى شىرعالاڭ تۋدىرعان باستى سەبەپ؛ حالىق سوتى مەكەمەسىنەن دەلو فاكتى مەن قاتىستى زاڭ - ەرەجەگە ساي، ەكى جاقتىڭ جاۋاپكەرشىلىگىن قايتا ايىرۋىن وتىنەمىن، تالاپكەر باستى جاۋاپكەرشىلىكتى ارقالاۋى ءتيىس.

تالاپكەردىڭ ارىز - شاعىم وكىلەتشىسى بىلاي دەپ سانادى: بۇل شىرعالاڭدى نيڭگو قالالىق قاتىناس ساقشى اترەتى تۇراقتاندىرعاندا، جاۋاپكەر شىرعالاڭداعى باستى جاۋاپكەرشىلىكتى، تالاپكەر قوسىمشا جاۋاپكەرشىلىكتى ارقالايدى دەپ بەكىتىلدى، زاڭ بەلگىلەمەسىنە نەگىزدەلگەندە، جاۋاپكەرشىلىكتى ايىرۋ ورىندى دا زاڭدى بولدى. تالاپكەر جۇرگىزگەن ەلەكتروسيكلدى ساراپتاۋ جاۋاپكەرشىلىك سالىستىرماسىن ايىرۋعا ىقپال جاسامايدى، شىرعالاڭ تۋعاندا ونىڭ كولىگى موتورسىز كولىك بويىنشا باسقارىلدى؛ بۇل كولىكتى موتورلى كولىك قاتارىندا قاراپ، جاۋاپكەرشىلىكتى تالاپكەرگە اۋدارۋ ادىلەتسىزدىك بولادى.

ارىز - شاعىم بارىسىندا حۋ xx قاتارلى 3 جاۋاپكەر حالىق سوتى مەكەمەسىنەن ساراپتاۋدى ءوتىندى. قاتىستى تاراۋلاردىڭ ساراپتاۋىندا چىن xxتىڭ جۇرگىزگەن ەلەكتروسيكلى موتورلى كولىككە جاتقىزىلدى. سونىمەن 3 جاۋاپكەر: چىن xx ءوزى جۇرگىزگەن ەلەكتروسيكلگە قاتىناس زورلىقتى قامسىزداندىرۋىن ساتىپ الۋعا ءتيىستى بولا تۇرا ونى ساتىپ المادى، سوندىقتان قاتىناس زورلىقتى قامسىزداندىرۋى كولەمىندە جاۋاپكەرشىلىك ارقالاۋى كەرەك، - دەگەندى العا تارتتى.

سۋديانىڭ قاراۋىنشا، شىرعالاڭ تۋدىرعان ەلەكتروسيكل موتورلى كولىك دەپ ساراپتالعانىمەن، بۇل ساراپتاما قاتىناس ساقشى تاراۋلارىنىڭ وسى رەتكى قاتىناس شىرعالاڭى تۋرالى شىعارعان جاۋاپكەرشىلىكتى ايىرۋ قورىتىندىسىنا ىقپال جاساي قويمايدى.

دەلونى قاراعان حالىق سوتى مەكەمەسىنىڭ قۇلشىنا جاراستىرۋىندا، داۋگەر ەكى جاق ءوز ەرىكتەرىمەن مىناداي تولەم بىتىمىنە كەلىستى: قامسىزداندىرۋ سەرىكتەستىگى تالاپكەرگە ءبىرجولاتا 620 مىڭ يۋان تولەم بەرەدى؛ حۋ xx الدىمەن بارلىق ەمدەلۋ قاراجاتىن چىن xxكە تۇگەلدەي تولەي تۇرادى؛ حۋ xx ىستەيتىن سەرىكتەستىك چىن xxكە 90 مىڭ يۋان تولەيدى. ءسويتىپ، ەكى جاقتىڭ بۇل رەتكى شىرعالاڭنان شىققان داۋ - شارىىنا اقىرعى نۇكتە قويىلدى.

  «حالىق سوتى گازەتىنەن» اۋدارعان: وركەن اقبەردى ۇلى

 

جاۋاپتى رەداكتور: جانار قاناپيا قىزى
جايمالاۋ