中文

اۋىل – قىستاق جاستار قىزمەتى جاندانۋعا مۇقتاج

ەرباقىت قابدەش ۇلى

جاستار قوعامنىڭ كەلەشەگى، الداعى جارقىن بولاشاق جاستارعا ءتان، جاستاردىڭ احىلاق، اقىل – وي، ساۋ دەنەلى بولىپ جەتىلۋى قوعامنىڭ ءتۇپكىلىكتى قاجەتى. ۇيتكەنى ولار بۇگىنگى باياشات قوعامدانۋ جورىعىنىڭ جاۋىنگەرلەرى. قازىر كوپتەگەن جاستار قوعامنىڭ سان – سالالى ورىندارىندا قىزمەت ەتۋدە. ال اۋىل – قىستاق جاستارىنىڭ دەنى باستاۋىش مەكتەپ تاۋىسقاندار، باسقا سالا جاستارىنا قاراعاندا، ولاردىڭ ءبىلىم ءساۋياسى تومەن، ءوندىرىس تەحنيكاسى دا ايتارلىقتاي جەتىلمەگەن، وسىنداي اۋىل – قىستاق جاستارىنىڭ يدەياسىندا '' قوعامعا شىقتىق، ەندى ءوزىمىز ءبي، ءوزىمىز قوجا '' دەيتىن جاڭساق كوزقاراس بەلەڭ بەرىپ، جازدىڭ 3 تە 4 ايىندا عانا ەڭبەك ەتىپ، باسقا ۋاقىتتارىن بوس وتكىزەتىن جالقاۋلىق؛ اراق ىشىپ سەندەلەتىن سەرگەلدەڭدىك؛ باسقالاردىڭ توي نەمەسە باس قوسۋلارىن قاساقانا بۇزاتىن بەيباستاقتىق، ۇرلىق جولىنا ءتۇسىپ، حالىقتىڭ مال – مۇلكىن زياندايتىن جانكەسپەلىك سياقتى قوعامعا زاردابى اۋىر ىستەر نەگىزىنەن جاستار جاعىنان تۋىنداپ وتىر. مۇنداي احۋالدىڭ ءجيى تۋىلىپ وتىرۋىنىڭ باستى قاينارى – اۋىل – اۋىل قىستاق جاستار قىزمەتىنىڭ جاندى جۇرىلمەۋى نەمەسە كەمەلدەنبەۋىندە. سوندىقتان اۋىل – قىستاق جاستار قىزمەتىن بۇكىل قىستاق قىزمەتىنىڭ ىشىندەگى ماڭداي الدى ورىنعا قويىپ، دەن قويا جۇرگىزۋ كەرەك. سوندىقتان مەن اۋىل – قىستاق جاستار قىزمەتىن پارمەندى جۇرگىزۋ جونىندە ءوز ويىمدى كوپپەن ورتاقتاستىرماقپىن.

1. اۋىل – قىستاق جاستارىنا بولعان ۇيىمدىق تاربيەنى جۇيەلەندىرۋ، كۇشەيتۋ كەرەك.

اۋىل - قىستاق جاستارىنىڭ باسىم كوبى وداق مۇشەلەرى، سوندىقتان قىستاق پارتيا ياچەيكاسى مەن جاستار وداق ياچەيكاسى تىعىز سايكەسىپ، جوسپار بويىنشا بوس ۋاقىتتاردان ۇتىمدى پايدالانىپ، جاستار ورتاسىنا ۇيىمدىق تاربيەنى قانات جايدىرۋ كەرەك. مۇندا نەگىزىنەن ۇيىمدىق جيىن، بۇقارالىق جيىن، قىستاق كادىرلار جيىنى قاتارلى قوعامدىق ۇيىسۋلاردان تولىق پايدالانىپ، ۋستاۆ ۇيرەنۋ، گازەت – ماتەريالدار ۇيرەنۋ ارقىلى قازىرگى بەت الىپ وتىرعان قوعام ورنىقتىلىعىن ساقتاۋ، جاراسىمدى قوعام قۇرۋ ساياساتىنىڭ ءمانى مەن ناتيجەسىن تەرەڭ ءتۇسىندىرۋ، جاستاردى بازار شارۋاشىلىعىنا بەت الدىرۋ سىندى ۇگىت قىزمەتىن پارمەندى جۇرگىزۋ كەرەك.

2. جاستار ورتاسىندا زاڭدىق تاربيەنى كۇشەيتۋ كەرەك.

جاڭادان مەكتەپ قۇشاعىنان قايتقان اۋىل – قىستاق جاستارىنىڭ زاڭدىق ورەسى وتە تومەن، ولار قوعامداعى جاقسى مەن جاماندى ايقىن ايىرىپ جاتپاستان وڭاي وزدەستىرىپ الادى. سوندىقتان قىستاق ەكى كوميتەت باسشىلىق القالارى جاستاردىڭ زاڭدىق كوزقاراسىن جەتىلدىرۋدى كوزدە ۇستاي وتىرىپ، اۋىل جانە اۋداندىق زاڭ ورگاندارىنان ارناۋلى ادامداردى ءار كەز زاڭ بىلىمدەرىنەن لەكسيا سويلەۋگە ۇسىنىس ەتىپ، زاڭدىق تاربيەنىڭ جۇرىلۋىنە جەتەكشى بولۋ كەرەك.

3. جاستار ورتاسىنا نەكە زاڭىن ۇگىتتەۋ كەرەك. قازىرگى اۋىل – قىستاق جاستارى ورتاسىندا نەكەدەن ەرتە اجىراسۋ قۇبىلىسى باسىم ورىندى يەلەپ وتىر. ءبىر وتباسى ءبىر قوعامدى قۇراۋدىڭ كىلەتكاسى. سوندىقتان جاستار قىزمەتىن جانداندىرۋدىڭ ماڭىزدى ءبىر قۇرامداس بولەگى جاستارعا نەكە زاڭىن ءتۇرلى فورمادا ۇگىتتەپ وتىرۋ كەرەك. دەمەك، بۇل جاستاردىڭ باياندى ماحاباتىن، باقىتتى وتباسىن ورناتۋدىڭ زاڭدىق كەپىلى.

4. اۋىل – قىستاق جاستارىن ءتۇرلى گازەت – جۋرنال وقۋعا شابىتتاندىرىپ، ۇيىمداستىرۋ كەرەك.

بۇل كۇندەرى « شىعىس جەلى ينجەنەرياسى » نىڭ كومەگىندە بارلىق قىستاقتارعا گازەت – جۋرنال بارىپ جاتىر. وكىنشكە وراي، وسى گازەت – جۋرنالدى وقيتىن اۋىل – قىستاق جاستارىنىڭ دەنى از. سوندىقتان قىستاق كادرلارى باس بولىپ، گازەت – جۋرنال وقۋدىڭ ماڭىزىن جاستار ورتاسىندا تەرەڭ ۇگىتتەۋلەرى كەرەك. بۇل نەگىزىنەن ۇيىمدىق جاقتان جۇرگىزىلسەدە بولادى. قازىر كوپ ساندى اۋىل – قىستاق جاستارى ۇن حاتقا نازارى اۋىپ، كوپ ۋاقىتىن بوستان – بوس وتكىزۋدە.

5. قىستاق مادەنيەت وتاۋلارىنىڭ رولىن تولىق ساۋلەلەندىرۋ كەرەك.

كوپ ساندى قىستاقتاردا زامانعا لايىق مادەنيەت ۇيلەرى شاڭىراق كوتەردى. مادەنيەت وتاۋىنىڭ ماڭىزى زور، ول جاستاردىڭ كوڭىل اشۋ، جيىندارعا ۇيىسۋ، ءتۇرلى مەرەكە – مەيرامداردا باس قوسۋ، ماتەريال كورۋ ورنى. سوندىقتان قىستاق مادەنيەت وتاۋىنىڭ رولىن جانداندىرىپ ونى اتى زاتىنا ساي جاستاردىڭ مادەني ارەكەت وزدىرۋىنىڭ تىرەكتى بازاسىنا اينالدىرۋ كەرەك.

6. قازىرگى جاستاردىڭ ءوندىرىس جۇرگىزۋ ءادىسى باياعى سول قالپىندا، ءوندىرىستى علمي ءادىس بويىنشا باعىپ – باسقارۋ جاعىندا ءالى دە جەتەرسىز جاعدايلار بەلەڭ بەرۋدە. قىسقى عىلىم – تەحنيكا قيمىلىن ورىستەتۋ جاعىندا ارناۋلى ماماندار كەلىپ ساباق وتسە، وسى قيمىلعا تولىق قاتىناساتىن جاستار سانى از. ال توي – تومالاق بولسا ۋاقىت شىعارادى. بۇل جاعىنداعى ءومىر ءسۇرىپ وتىرعان  جايىتتەردى كوپشىلىككە ايتپاساقتا تۇسىنىكتى. سوندىقتان بۇل جاعىندا قىستاق باسشىلىق القالارى جاستارعا يدەيالىق تاربيە قىزمەتىن كۇشەيتىپ، جاستاردىڭ كاسبي قابىلەتىن تولىق ساۋلەلەندىرۋ جاقتارىندا جەبەۋشى بولۋلارى كەرەك.

ءبارىن ايتتا، ءبىرىن ايت دەمەكشى، اۋىل – قىستاقتاردا شىنىندا وسىنداي بىرنەشە قىزمەت ءتۇيىنى قولعا الىنسا، جاستار ءسوز جوق قاجىرلى ەڭبەكتىڭ يەسى، قوعامنىڭ جارامدى ادامى، جاڭاشا اۋىل – قىستاق قۇرۋدىڭ بەلسەندى العا باسار ءبىر مۇشەسى بولىپ شىعا الاتىندىعىنا كامىل سەنەمىز.

ءتىلشىنىڭ ءادىرىسى:  جەمەنەي اۋدانى ۇلاستى قالاشىعى

جاۋاپتى رەداكتور: قابىلقان ايتقابىل ۇلى
جايمالاۋ