中文

بالا بازىناسى

جايناگۇل ءشارىپ قىزى

جوعارى مەكتەپتە وقىعان كاسىبىم ورتانى قورعاۋ عىلىمى بولسادا قوعام تابالدىرىعىن اتتاي سالا اقپاراتتىڭ جان تامىرى بولعان تىلشىلىك كاسىبىنىڭ تىزگىنى بۇيىردى دا، الدىڭعى بۋىن ۇستازدارمەن بىرگە اۋدان، اۋىلدى ارالاپ تىلشىلىك ساپاردا جۇردىك. وسىنداي كۇندەردىڭ ءبىر ساتىندە اۋىلدا قىزمەت ىستەيتىن ءبىر اپەكەمەن تانىستىم، جاقسىدا جاتتىق جوق دەگەندەيىن، جاسىمىز پارىقتى بولسادا ول كىسىمەن جاقىن دوستاردان بولىپ كەتتىك.

ول كىسىنىڭ ەرجەت دەگەن جالعىز ۇلى بار ەدى، «1 - كلاسقا ەندى عانا تۇسسەدە تاپسىرما ورىنداپ، ساباق پىسىقتاۋدا قامشى سالدىرمايتىن ەلپەك بولدى» دەپ اناسى ۇنەمى قۋانىشىن مەنىمەن ءبولىسىپ ايتىپ جۇرەتىن. سودان 2 جىلدان كەيىن ول كىسى اۋدانعا اۋىسىپ كەلدى. اۋىل اراسى جاقىن بولعاندىقتان جۇبايى اۋىلعا كولىكپەن بارىپ - كەلىپ تۇراتىن. ساعاتتىڭ شىقىلىمەن جىلىستاپ وتكەن ۋاقىت اراعا 5 جىلدى سالىپ ۇلگىردى، ءبىر كۇنى كەشتە كىشكەنتايىمدى ەرتىپ سول اپەكەنىڭ ۇيىنە باردىم، ەسىكتى قاعىپ ەدىك ەرجەت ەسىك اشتى، ۇيدە ءوزى جالعىز ەكەن، ونىڭ ايتۋىنشا، اكەسى جۇمىس بابىمەن تاۋعا كەتكەلى 15 كۇندەي بولىپتى دا، اناسى ءبىر دوسىنىڭ قوناعىن كۇتىسكەلى كەتىپتى، يەن ۇيدە جالعىز زەرىگىپ وتىرعان ەرجەت ءبىزدى كورىپ توبەسى كوككە جەتكەندەي قۋانىپ كەتتى، ءبىز ۇيگە كىرە سالا ەرجەت ماعان: «اپەكە ءسىز شاي قايناتىڭىز، ۇشەۋىمىز وتىرىپ شاي ىشەيىك»، - دەدى. «كەشكى تاماعىڭدى ىشپەدىڭ بە»؟ - دەپ ەدىم، ول: «شەشەم كوشەدەن تاماق اكەلىپ بەرىپ كەتكەن، جەگىم كەلمەدى ۇستەلدە تۇر»، - دەدى. ۇستەلگە قاراسام، راسىندادا، سۋىپ جابىسىپ قالعان سۋلياۋ دورباداعى لاڭمان تۇر ەكەن،   كوڭىلىم ءبىر ءتۇرلى مۇزداپ كەتتى، اناسىنا تەلەفون شالدىم، ۇلار - شۋ، ءان مەن كۇي، اپەكەمىزدىڭ ءبىر ءسوزى ەستىلسە، ءبىر ءسوزى ەستىلمەيدى، قازىر قايتامىن دەپ تەلەفوندى جاپتى، سودان ۇشەۋىمىز شايعا وتىردىق، شاي ءىشىپ وتىرعان ەرجەت ماعان: اپەكە ءسىز قوناق كۇتكەندە اراق ىشەسىز بە؟ - دەپ سۇراي قالدى، نە دەرىمدى بىلمەي، ايەل ادام اراق ىشپەيدى ەمەسپە دەي سالدىم. ول ۇندەمەدى، ەرجەت ءبىزدى جىبەرگىسى كەلمەگەن سوڭ ءبىرتالاي ايالداپ قالدىق، تەلەۆيزورداعى قۋىرشاق فيلم مەنىڭ كىشكەنتايىمدى باۋراپ اكەتتى، ەرجەت مەنىڭ قاسىما كەلىپ، اپەكە: مەن وسى كەزدە كۇندەلىك جازىپ ءجۇرمىن، قازىر باستاۋىشىڭ 6 - جىلدىعىن وقيمىن، ساباعىمىز دا كوپ، تاپسىرمامدى ورىنداپ بولعان سوڭ كۇندەلىك جازامىن، كورەسىز بە؟ - دەدى، بالادا نە قۇپيالىق بولۋشى ەدى، ونەرىن كورسەتىپ ماقتانعىسى كەلىپ تۇرعوي دەپ مەسەلدەسىن قايتارماي وقيىن دەدىم، كىشكەنتاي عانا قارا ەستەلىك ەكەن، ورتاسىنان ءبىر بەتىن اشىپ وقىپ قالدىم، كۇندەلىكتىڭ تەمەسى شەشەم بۇگىن تاعى قوناقتا دەپ جازىلىپتى، سودان ارى وقي باستادىم...

مەن بۇگىن ۇيدە تاعى جالعىز قالدىم، ۇيدە جالعىز وتىرۋعا دا ۇيرەنىپ كەتتىم، ويتكەنى اكەم مالشىلاردىڭ مالىن ەمدەپ ۇيگە قايتپاي قالادى، شەشەمنىڭ دوسى وتە كوپ، ولار شەشەم بولماسا قوناق كۇتە المايتىنداي شەشەمدى شاقىرىپ توقتاتپايدى، شەشەم دە ولاردىڭ ءتىلىن بۇرمايدى، ۋاقىت بولسا مەنىڭ تاماعىمدى ىستەيدى، ۇلگىرە الماسا كوشەدەن ساتىپ اكەلەدى دە كەتەدى، باستابىندا ۇيدە جالعىز قالعاندا قاتتى قورقاتىنمىن، قازىر قورىقپايتىن بولىپ كەتتىم، ءتۇننىڭ ءبىر ۋاعىندا شەشەم كەلەدى، شەشەمنىڭ ۇيگە كەلگەنىن كەيدە بىلەمىن، كەيدە ۇيىقتاپ بىلمەي قالامىن، كەيىنتىندە شەشەمنىڭ قوناق كۇتكەندە اراق ءىشىپ كەلەتىنىن ءبىلىپ قالدىم، سودان كلاستاعى دوستارىمنان اقىرىن: شەشەڭ اراق ىشە مە؟ - دەپ سۇراپ كورسەم، ولاردىڭ كەيبىرەۋى: اكەم ىشەدى، شەشەم ۇرسادى دەسە، كەيبىرەۋى ەكەۋى دە ىشپەيدى، - دەدى. ءبىر كۇنى شەشەم قوناقتان ەرتە كەلدى، قۋانىپ شەشەمدى قۇشاقتادىم، شەشەم ساعىز شايناپ الىپتى، دەنەسىنەن اراق پەن تەمەكىنىڭ ءيىسى شىعىپ تۇر. «شەشە اراق ءىشىپ العانسىزبا دەسەم، جوعا بالام»، - دەدى. ءبىراق مەن ءبىلدىم، ول اراق ءىشىپ كەلىپتى، شەشە ەندى قوناققا بارماشى، دوستارىڭ قوناعىن ءوزى كۇتسىن، - دەدىم، شەشەم ماعان: بولمايدى بالام، ولار مەنىڭ جاقسى دوستارىم، بارماسام رەنجيدى، - دەدى. مەنىڭ ساباقتاستارىمنىڭ دا شەشەلەرىنىڭ دوستارى بار، ولارعا قوناق كەلمەي مە، شەشەلەرى ۇيدەن شىقپايدى، ولار ساباق ارالىعىندا ۇنەمى شەشەم تاپسىرمامدى تەكسەردى، شەشەم ۇرىستى دەپ جاتادى، مەن ماعان ەشكىم ۇرىسپايدى دەيمىن، ولار ماعان سەنىڭ شەشەڭ نەدەگەن جاقسى دەيدى، مەنىڭ شەشەم راس جاقسى ما؟...

ارى قاراي وقي المادىم، وزەگىم ورتەنىپ، كوڭىل كۇيىمدى تەجەي المادىم، ەرجەت مەنىڭ باعامدى كۇتىپ قاراپ وتىرعاندىقتان باسىمدى كوتەرسەم كوز جاسىمدى كورىپ قالاما دەپ ەڭكەيگەن قالپىمدا: ەرجەت، راسىندا دا، جاقسى جىگىت بولىپسىڭ عوي، كۇندەلىكتى كەرەمەت جازىپسىڭ، - دەدىم. ءۇنسىز وتىرعان ول ماعان: اپەكە سىزدەر ۇيگە كوپ كەلىپ تۇرىڭىزدارشى، قوناعى كوپ اپەكەلەرمەن دوس بولماڭىز، ايتپەسە ۋاقىتىڭىز جوق بولىپ قالادى، - دەدى. جاس جۇرەكتىڭ رياسىز وتىنىشىنە باسىمدى ءيىپ «ماقۇل» دەدىم. بالا بولسادا وتباسىنىڭ ىستىق مەيىرىن اڭساعان قۇشتارلىق جانارىنان مەن مۇندالاپ تۇر. وي تەڭىزىنە باتقان مەن، − اپەكە، انا دەگەن اتقا لايىق بولىڭىزشى دەگىم كەلدى، جۇرەگىمدى بالا مۇڭى جەگىدەي جەپ ەرىكسىز كۇرسىندىم...

جاۋاپتى رەداكتور: جانار قاناپيا قىزى
جايمالاۋ