中文

اكە رولىنىڭ ماڭىزى

كوپشىلىك بالا تاربيەسىن اناعا جۇكتەپ قويادى.بۇل دۇرىس ەمەس. ويتكەنى بالا تاربيەسىندە انانىڭ دا، اكەنىڭ دە رولى ماڭىزدى. اسىرەسە، ەر بالا تاربيەسى تىكەلەي اكەگە بايلانىستى. اكە – ۇلى ءۇشىن ۇلگى تۇتار ادام، ومىرلىك ۇستاز. قىز اناعا قاراپ وسسە، ۇل بالانىڭ اكەگە قاراپ وسەتىنى تۇسىنىكتى.سوندىقتان كەيبىر اكەلەردىڭ «بالامدى ماتەريالدىق جاعىنان قامتاماسىز ەتسەم بولدى،تاربيەسى شەشەسىنىڭ موينىندا» دەۋى ۇلكەن قاتەلىك. ەندەشە، ءار اكە ۇلىنىڭ بويىنا قانداي قاسيەتتەردى دارىتا ءبىلۋى كەرەك؟

1.جاۋاپكەرشىلىك

ەر جىگىت بويىنداعى ەڭ اسىل قاسيەت–جاۋاپكەرشىلىك. سوندىقتان ۇل بالانى جاۋاپكەرشىلىككە تاربيەلەۋدىڭ ماڭىزى زور. تاربيەنى انادان گورى اكەسى ناقتى ىسپەن دالەلدەپ، ءوزى بەرگەنى دۇرىس.ويتكەنى سوزىندە تۇرا المايتىن،اۋىزبەن ايتقانىن موينىمەن كوتەرە المايتىن جىگىتتىڭ ەر ەمەس، ناعىز ەز ەكەنى تۇسىنىكتى.

  2. تازالىق

 «جۋۋ،ءسۇرتۋ،جيناۋ مەن تازالاۋ ايەل ادامنىڭ مىندەتى عوي» دەرسىزدەر بىردەن.ءيا،بىراق كىشكەنتاي بالا كورگەنىن ىستەيدى.ال تازالىقپەن تەك اناسىنىڭ اينالىسىپ، اكەسىنىڭ قول تيگىزبەگەنىن كورگەن بالا ول–تەك انانىڭ مىندەتى دەپ ۇعىپ،ءوز ارتىن جيناۋدى قويادى.سوندىقتان اكەنىڭ مىندەتى–ءار ادام ءوز بويىنىڭ تازالىعىنا، اينالاسىنىڭ تازالىعىنا ءوزى جاۋاپتى ەكەنىن ءتۇسىندىرۋ. ءتىس تازالاۋ، بەتى-قول جۋ، كيىم-كەشەكتىڭ تازالىعى،جەكە گيگيەنا مەن تازا ءجۇرىپ-تۇرۋ بارلىعىنىڭ باستاۋى–تازالىق. كيىم اۋىستىرۋ، ونى بۇكتەپ جيناۋ، تاعىسىن تاعىلار ءار بالانىڭ كىشكەنتايىنان مەڭگەرەتىن نەگىزگى مىندەتتەرى.اكە،ءوزىڭىز ۇلگى بولۋىڭىز كەرەكتىگىن ۇمىتپاڭىز!

 

3. قارجىلىق

بىلىكتىلىك بالالارعا قارجى جايىندا «لەكتسيا وقىپ»، ساباق بەرۋ ەشقاشان ەرتە بولمايدى. ۇل بالالار اقشانىڭ قادىرىن ەرتە ۇعىپ، ءوز شىعىندارىن دۇرىس جوسپارلاۋدى دا مەيلىنشە ەرتە ۇيرەنسە، كەيىن ۇلكەن ومىرگە وزدىگىمەن قادام باسۋى دا وڭاي بولماق. ەندەشە، ول ءۇشىن ەرتە باستان ۇلىڭىزعا ءار تەڭگەنىڭ ماڭداي تەرمەن كەلەتىنىن ۇيرەتە بەرىڭىز. قامشى ۇستارىڭىزبەن اقىلداسا جوسپارلاۋدى ادەتكە اينالدىرىڭىز.

4. ۇرىس-كەرىستى شەشۋ جولدارىن ۇيرەتىڭىز

 ۇل بالالار ەرتە جاستان-اق ءتۇرلى «وقيعالارعا» ءجيى ۇشىراپ جۇرەدى.ال كىشىگىرىم ۇرىس-كەرىستىڭ اياعى جۇدىرىقتاسۋعا ۇلاسىپ كەتپەۋى ءۇشىن، ونى شەشۋ جولدارىن ۇيرەتۋدىڭ ماڭىزى زور.ونداي جاعدايلارعا تاپ بولعاندا شىعۋ جولى قانداي؟ قاي كەزدە ءوزىن قورعاپ، جۇدىرىققا ەرىك بەرۋ كەرەك، ال قاي كەزدە كەشىرىم جاساۋ كەرەك؟ ونى ەر بالاعا انا ەمەس، اكە ۇيرەتۋى كەرەك.

  5. كۇيزەلىسپەن كۇرەسە ءبىلۋ

 سابىرلىق تانىتۋ مەن ارنارسەنى اقىلعا سالۋ-كەز كەلگەن جاعدايدان شىعار جول ەكەنىن بالاڭىزعا ەرتە جاستان ۇيرەتىڭىز. ويتكەنى كىشكەنتايىنان ءتوزىمدى بولىپ وسكەن بالا، ۇلكەن ومىرگە قادام باسقاندا قانداي جاعداي بولماسىن، كۇيزەلىسكە ءتۇسىپ، سالىن سۋعا جىبەرىپ وتىرماسى انىق.

 

جاۋاپتى رەداكتور: ءاننا اكىمقان قىزى
جايمالاۋ