中文

قىز بالانىڭ گيگيەناسى

بالانىڭ جاسىنان دەنەسىن - شىمىر، ءوزىن - ونەگەلى ەتىپ تاربيەلەۋ كەلەشەك ومىرىنە زور اسەرىن تيگىزەدى. اتا - اناسى كىشكەنتايىنان تازالىققا، تارتىپكە، بەلگىلى ءبىر قالىپقا، شاماسى كەلەتىن جۇمىسقا داعدىلاندىرا وتىرىپ، پەرزەنتىن كورگەندىلىككە ۇيرەتەدى. وسى ارقىلى ونىڭ الداعى ۋاقىتتا ءار ءتۇرلى اعاتتىقتاردان، جىنىستىق قابىلەتى جەتىلىپ كەلە جاتقان كەزدە ، ۇرىنشاقتىقتان اۋلاق بولۋىنا كومەكتەسەدى.  اسىرەسە قىز بالانىڭ تاربيەسىندە ەرتە باستان ەسكەرگەن جاقسى.  ەرتەڭگى كۇنى انا بولاتىن قىزداردىڭ دەنساۋلىعىنىڭ دۇرىستىعى - بولاشاق ۇرپاق دەنساۋلىعىنىڭ كەپىلى.

قىز بالا اعزاسىنىڭ وزىندىك ەرەكشەلىكتەرى بار: ەر بالاعا قاراعاندا ول نازىك كەلەدى، اناتوميالىق ايىرماشىلىقتار ارناۋلى گيگيەنانى تالاپ ەتەدى. قىز بالاعا تۋعان بويدا-اق ۇقىپتى قاراۋعا تۋرا كەلەدى. ونىڭ جالپى دەنەسىن تازا ۇستاۋمەن قاتار، سىرتقى جىنىس مۇشەلەرىنىڭ تازالىعىنا قاتتى كوڭىل اۋدارۋ كەرەك، ويتپەگەندە نەسەپ پەن ءناجىس ولاردى بىلعاپ، تىتىركەندىرۋى، ءسويتىپ جۇقپالى اۋرۋعا ۇرىندىرۋى مۇمكىن.

 اناسى قىزدى شومىلدىرۋمەن قاتار (التى ايعا دەيىن- كۇن سايىن، ءبىر جاسقا دەيىن-  كۇن ارا، ودان كەيىنگى جەردە اپتاسىنا ءبىر رەت) ۇلكەن دارەتكە وتىرعىزعان سايىن قىزدىڭ جىنىس مۇشەسىن تازا جىلى سۋمەن سابىنداپ جۋعا ءتيىس، جۋعاندا الدىدان ارتقا قاراي، ياعني، قولمەن تىك ىشەككە قاراي سيپاي جۋعان ءجون. ەگەر ءسىز زاماناۋي قاعاز جايالىقتار (پودگۋزنيك) قولداناتىن بولساڭىز، ونى ءار 3 - 4 ساعات سايىن اۋىستىرۋ قاجەتتىگىن ۇمىتپاڭىز. جانە مۇنداي جاعدايدا جىنىس مۇشەسىن ءار تازا جايالىق كيگىزەر الدىندا جۋۋ قاجەت. بالانى جۋىندىرىپ، تازا شۇبەرەكپەن كەپتىرگەن سوڭ 10 - 15 مينۋت جالاڭبۇت ۇستاڭىز. بۇل قالىڭ جايالىقتاردىڭ اسەرىنەن تەرىنىڭ تەرلەپ، بازدانۋىنىڭ الدىن الادى. ەگەر تۇندە جايالىقتى اۋىستىرىپ، نارەستەنىڭ ۇيقىسىن بۇزعىڭىز كەلمەسە، 12 ساعاتقا دەيىن شىدايتىن  وتە ساپالىسىن تاڭداڭىز. مۇنداي ءبىر رەتتىك جايالىقپەن ءوسىپ جاتقان بالانى تاۋلىگىنە ءبىر - ەكى رەت جارتى ساعاتتان جايالىعىن شەشىپ، بوس ۇستاۋ كەرەك. بولمە سالقىن بولسا، اۋا وتكىزەتىن ماقتا ماتادان تىگىلگەن شالبار كيگىزىپ قويىڭىز.

ءسابي التى ايدان اسىپ، قوسىمشا تاماق ىشە باستاعان كەزىندە ونى توسىپ ۇيرەتىڭىز. بۇل كەزدە ونىڭ ىشەگى باسقاشا جۇمىس ىستەيدى جانە مازاسىزدىق بەلگىلەرى بايقالعاندا ۇلكەن دارەتكە وتىرعىزىپ الۋ قيىنعا سوقپايدى. بالا كىشكەنە وسە باستاعان كەزدە وعان قۇيرىعىن جۇمساق قاعازبەن ءسۇرتۋدى دە ۇيرەتۋ كەرەك. مۇندا دا قولدى الدىنان ارتقا قاراي جۇرگىزۋگە داعدىلاندىرعان دۇرىس.

جاڭا تۋعان قىز بالانى تۇزگە وتىرعىزۋدىڭ الدىندا اناسى ءوزىنىڭ تىرناعىن الىپ، سونان سوڭ قولىن سابىنداپ جۋعانى ابزال. جاس ءسابيدىڭ تەرىسى مەن كىلەگەي قابىقتارى اسا جۇقا، ءسال نارسەدەن جاراقاتتانىپ قالاتىن نازىك، جىنىس مۇشەسىنە سىزات ءتۇسىپ، وعان ميكروپ ەنىپ، اۋرۋ قوزدىرۋى ىقتيمال. بۇل ەرەجە بارلىق جاس انالارعا قاتىستى.

 بالانىڭ قۇيرىعىنىڭ اراسى، شابى پىسىپ كەتپەۋى ءۇشىن تازالاعاننان كەيىن، قايناتىلعان كۇنباعىس مايىن جاعىپ نەمەسە بالالار وپاسىن سەۋىپ قويۋ كەرەك. بالانىڭ بەتى - قولىن جانە استىن ۇدايى جۋىپ تۇرۋدىڭ گيگيەنالىق قانا ەمەس، سونىمەن قاتار تاربيەلىك تە ءمانى بار. جيناقى ءجۇرىپ، كۇن سايىن دارەت الۋدى، ءىش كيىمدەرىن الماستىرىپ كيۋدى قىز بالا جاسىنان ادەتكە اينالدىرسىن. سوندا جىلدان - جىلعا بۇل شارالاردىڭ ءمانى ارتا ءتۇسىپ، اقىرى تابيعي قاجەتتىلىككە اينالىپ كەتەدى.

 

 

جاۋاپتى رەداكتور: ءاننا اكىمقان قىزى
جايمالاۋ