中文

باق پەن باقىت قايدان كەلەدى

ءبىرىنشى: اقاۋسىز دەنساۋلىقتان كەلەدى.

دەنساۋلىق − زور بايلىق. مىقتى دەنساۋلىق بولعاندا عانا، شۇعىلدانعان جۇمىسىڭنان ناتيجە جاراتا الاسىڭ، پسيحيكالىق اقاۋسىزدىق تا توتەنشە ماڭىزدى. دەنىڭ ساۋ، پسيحيكاڭ اقاۋسىز بولسا، قىزمەت پەن تۇرمىستاعى ىستەرىڭ وڭىنا باسىپ، ءومىرىڭ ءماندى دە ءساندى وتەدى.

ەكىنشى :جاقسى كوڭىلدەن كەلەدى.

ىزگى نيەتتى، اق كوڭىل بول. اق كوڭىلدىڭ اتى ارىپ، تونى توزبايدى. جاقسىدان شاراپات، جاماننان كەساپات دەگەندەيىن، اق كوڭىل ادامنىڭ جاقسىلىعى الدىنان شىعىپ، جولى قاشاندا اشىق بولادى.

ءۇشىنشى:جاقسى تۇسىنىكتەن كەلەدى.

تۇسىنىك بەكىمگە كەنەلتەدى، بەكىم ارەكەتكە ىقپال جاسايدى، ارەكەتتەن ناتيجە شىعادى. ومىرگە كەلگەن ەكەنسىڭ، ءومىر ءسۇرۋ داعدىلارىن ۇيرەنۋگە قۇلشىنىپ، سول ءۇشىن جاعداي جاساۋىڭ كەرەك. جاعدايىڭ جار بەرسە، وزگەلەرگە كومەك قولىڭدى سوز.

ءتورتىنشى:جايلى مىنەزدەن كەلەدى.

مىنەزىڭ جايسىز بولسا، ادامدار ارا قاتىناستا ۇتىلاسىڭ، ول دەنساۋلىعىڭا ىقپالىن تيگىزىپ، اشۋ - ىزا ءومىرىڭدى قىسقارتادى. مىنەزىڭ وتە شارگەز بولسا، تاعدىر ساعان پىسقىرىپ تا قارامايدى. ءۇمىتتى اقتاۋ ءۇشىن، اشۋ شاقىرما، ىزاعا بۋلىقپا، سابىرلى بول. سابىر ءتۇبى − سارى التىن.

بەسىنشى:جايدارى جۇزدەن كەلەدى.

«جول جۇرسەڭ كۇن رايىنا، ۇيگە كىرسەڭ ءۇي يەسىنىڭ قاباعىنا قارا» دەپتى بىرەۋ. سەنىڭ قاپالانعان، اشۋلانعان جانە قىنجىلعان كەزدەگى بەينەڭدى ەشكىمنىڭ كورگىسى كەلمەيدى. شىن جۇرەكتەن وزگەنى قۇرمەتتەۋ مەن كۇلىمسىرەۋ سىزگە قاشاندا جاقسىلىق باعىشتايدى.

التىنشى:جاقسى لەپەستەن كەلەدى.

جاقسى ءسوز − جارىم ىرىس، جىلى - جىلى سويلەسەڭ، جىلان ىنىنەن شىعادى. ىزگى ءىس ىستەپ، باۋىرمال ءارى سىپايى بولساڭ، باق ساعان ءۇيىر بولادى. سيعا سي، سىراعا بال كورسەتە ءبىل. اۋرۋ اۋىزدان، پالە تىلدەن كەلەدى، ال كەيىسەڭ ماسەلەنى شەشە الماي، قاڭقۋ ءسوز ەستيسىڭ.

جەتىنشى:يبالى ارەكەتتەن كەلەدى.

اقاۋسىز ءومىر كوزقاراسى ومىرگە دۇرىس باعدار نۇسقايدى. ءوز ارەكەتىڭدى باعامداپ، وزىڭە ۇنەمى ەسكەرتۋ بەرىپ، يگى ءىستى كوپ ىستەپ، بوداۋ بەرۋدەن تايىنباساڭ، باق پەن باقىت ەگىز كەلەدى.

سەگىزىنشى: قويۋ قارىم - قاتىناستان كەلەدى.

قوعامدىق ومىردە ادامدار ءبىر - بىرىنە ىقپال ەتەدى، ءومىر ءسۇرۋ، وركەندەۋ بارىسىندا مەيلى ءبىلىم الۋ، جۇمىس تابۋدا، الدە ۇكىمەت ءىسى نەمەسە جەكە ىستە بولسىن، ءتۇرلى قارىم - قاتىناسقا سۇيەنەسىڭ. قويۋ قارىم - قاتىناس ىزگى نيەت جانە تاماشا مورالمەن جەتىلىپ، شىنايىلىقپەن شيرايدى.

ءومىر بەينە ىدىس سەكىلدى. وندا كوڭىلدىلىك كوپ بولسا، مازاسىزدىق از بولادى، وندا العىس ايتۋ كوپ بولسا، ازاپ از بولادى، وندا تۇسىنىك كوپ بولسا، قايشىلىق از بولادى، وندا دوستىق كوپ بولسا، دۇشپاندىق از بولادى.

   اۋدارعان: ساعىنبەك رابات ۇلى

جاۋاپتى رەداكتور: ءاننا اكىمقان قىزى
جايمالاۋ